E nu, ci es u reali histori de Cinerala. Tu posi previo pa akusti de Cinerala, sed plu hetero histori, de u-ci ju-fe, dice de magika. Sura, plu-pe utili un idea de `magika' te obskura plu veri faktu, alo te simplifi u histori pro plu infanta.

Iso plu hetero histori, Cinerala es u centralo karaktera; sed intra u-ci veri histori, tu fu detekti u reali kausa de plu acide. U tem imedia pre plu acide de u-ci histori, Cinerala pa habita u mega no-puri kuko-ka de u mega paleo domi. U domi pa habe loka intra u pusi viki de u pusi regi-landa, ge-loka intra Europa duranto plu Skuto Tem. U-la tem, plu matri pa habe permito de bate mu plu fe-fili; plu an-prince pa habe u libera te game ali gina de mu regi-landa; e plu dina grandi persona pa gene pusi reakti anti mu plu kako skema.

Vita pa pasa minus muta: plu matri pa bate mu plu fe-fili; plu plu regi-pe pa dona krati a mu landa iso id pa eqa mu ludo-ra; e plu dina grandi persona pa libe akti mu plu skema.

U Cinerala histori dice de mo ideo an-regi, mo ideo dina grandi persona, mo ideo matri, e mo ideo fe-fili. Duranto u bi-ze anua regi-tem de Frederiko u Liberali, plu acide pa eqa norma: an pa face plu legi; e plu ge-regi-pe pa obedie. Sura, plu legi nili-tem pa habe gravi. Ko-co, ex u kastela de Fe Magika; ge-loka to u dista margina de u regi-landa, pa ki poli xeno histori. Plu-pe ne pa ki proxi fe kastelaka mu pa habe fobo de id. Anti-co, Fe Magika ne pa es u magika-fe, sed fe pa tenta akti so.

De plu ge-regi-pe de Frederiko, mo pa es Fe Pompo; qi habita u grandi domi ko fe tri fe-fili. Fe pa liberali uti u valuta; e holo- tem pa habe epi fe-auto plu maxi mode vesti. U valuta; qi permito fe de habe u loka intra societa, pa veni ex fe andra; qi pa gene morta. Kron fe pa gamo an, Fe Pompo pa habe bi fe-fili; e fe andra pa habe mo kali fe-fili, ge-nima Kali. Post u morta de fe patri, Kali pa eqa u fe-fili; qi pa gene u bate ex Fe Pompo. Alterno, fe hemi-fe-sibi pa ki a holo plu socia eveni; e, te akti so, pa gene poli dekora vesti.

Ma mali de co, Fe Pompopo don a Kali holo un ergo de pura mu domi. Mali fortuna, plu vesti de u ju-fe pa gene lacera e ge-tegu ko u cinera ex plu piro-lo. Proto, fe plu hemi fe-sibi e hemi-matri pa nima fe "Cinera," seqe "Cinera-la," e po-co "Cinerala." Kali, qi pa debi geneti u grandi domi, anti-co, pa gene sti per dina te akti iso u servi-pe.

Klu-co, plu-ci ra pa eqa plu norma acide intra u regi-landa to u-la tem. E plu-ci acide sio pa dura iso, durante poli anua; sed, kausa Antoni, id ne pa es so. U-ci Antoni pa es un An-prince Antoni; qi pra kreske a mo-okta anua tem an ki-in u bio de Kali. Plu-pe pa expekta, an sio game; sed Antoni pa nuli-tem dice de id; e an patri, An-regi Frederiko, pa habe mega anxio de an selekti u gina.

Holo plu juveni femina de u regi-landa pa vo game An-prince Antoni; sed an pa monstro no volu pro plu femina. Fe Pompo e holo fe plu amika pa dice de nuli alterno: qo-fe Antoni fu game, e qo-tem. Sura, bi Bibi e Fibi, plu kako fe-fili de Fe Pompo, pa puta skope Mu-auto intra u regi-do.

U faktu: ke Antoni ne pa amo plu ju-fe, pa es ge-ski de u holo demo. An-regi Frederiko pa tenta, per poli mode, sti Antoni te enkontra plu kali pluto femina, sed de no seqe. An-prince Antoni pa ski: plu-ci juve femina pa dice alelo, u holo tem, de plu vesti mode e de plu ki e akti de plu-pe intra pluto societa. Qod an pa cerka pa eqa plu realo persona, e mo realo juve femina. Plu-pe pa du dice: ke Antoni nuli-tem fu gene ge-game; e un an-regi pa sensi id pa gene tem pro an tenta u specialo eveni te detekti u gina pro an an-fili. An pa kogita: "U juveni andra nece gene uno-fe. Pro u regi-landa, an debi akti id." e an judika, "Mi nece uti akti-dina te kausa an elekti u gina."

Akorda-co, un idea pa kresce intra u menta de un an-regi; u-ci idea pa kresce e pa kresce a-kron id pa forma-se in u mega grandi-kore. Frederiko u Liberali pa judika: an sio petitio pan plu ge-regi-pe, e, pluso, plu pluto juveni femina ex plu proxi e tele regi-landa. Mu fu habe u grandi-kore; qi fu gene ge-memo tem poli anua; e Antoni fu selekti u gina.

U skema pa habe kompleti. Kausa holo u publika, pano-pe sio este-expekta: Antoni nece selekta u gina. "Sura," Frederiko pa puta, "Antoni sio amo mo de plu-ci ju-fe. Ultima, mi habe an!"

E so, id pa sembla. Antoni pa gene dona un info de u grandi- kore; e an pa ski: an pa habe no posi okasio te sto id. Seqe, u mega numera de plu petitio pa gene bali, ex u regi-do, in plu peri landa. Pa es no salva pro Antoni; an pa logi: ke u-ci eqa u fini. An sio nece game mo de plu-ci mode-vesti, vakua-kefa ju-fe.

Un info de u-ci fu-eveni pa kausa fo mega excita in u regi- landa. E, intra u domi de Cinerala, pa es disputa ex eo a vespa ... qod fe-sibi sio gene vikto de un an-prince: Fibi, u paki fe-sibi, per fe lato ski de u grandi societa; alo Bibi, un alti mo, ko fe ski de pano mikro mero de vesti mode.

Tem-co, u holo demo pa habe mega stimula koncerne u grandi- kore - e u seqe game - klu intra plu maxi tele gona de Frederiko regi- landa. Intra u maxi dista mo de plu-ci gona, pa es ge-situa u kastela de Fe Magika. E intra u ge-torti menta de Fe Magika, u mali skema pa gene morfo. Intra u bio de An-prince Antoni, Fe Magika sio kausa konfusi: fe sio injekti u kali juveni femina in u grandi-kore te klepto Antoni ex plu pluto societa femina. Prima, Fe Magika pa nece detekti u kongrue no ge-ski ju-fe. Po-co fe sio nece dona kali ad u ju-fe, e tegu fe intra u maxi dekora vesti - pre bali fe in u grandi- kore.

Fe Magika pa mite fe espio, Hogo, in plu viki e agri-landa te kripto detekti holo plu no ge-ski ju-fe; e te tosto reporta a fe. So, per u-ci mode, Cinerala pa gene selekti ki ad u grandi-kore. Fe fu sio es u dekora ge-vesti, misteri kali-fe; qi kapti u kardia de un An-prince.

Po plura di, Hogo pa ki verso a Fe Magika ko un info: Cinerala pa eqa u persona; pro qi fe pa cerka. An pa kredi: fe sio muta in u maxi kali gina; qi fu kapti u kardia de un An-prince.

Fe Magika pa memo Cinerala e fe patri. "Veri," fe kogita, "Nuli-pe pa dona justi a Cinerala; sed, per u-ci skema, mi sio posi akti id." Fe pa medita, "Posi mi fu akti uno-ra boni, u-ci kron." Seqe, il pa es mega ergo intra u skoto kastela. U maxi dekora kore- vesti pa gene ge-face; e pluso, plu medika-ma te dona kali a Cinerala pa gene ge-prepara.

Duranto u di pre u grandi-kore, u holo regi-landa pa habe u stato de excita. Kontra-co, pro Cinerala, u-la di pa es tanto no-tolera: ka plu hemi-fe-sibi pa moti fe ci e la, no-stop, u holo tem. Fe pa ergo ta forti ke fe pa volu somni minus vora. E, posto plu hetero femina pa ki apo, Cinerala pa kade, tanto somni, epi fe kli. Tem fe soma pa bate u kli, fe pa memo kogita, "Lase mu habe mu grandi-kore." e posto u-la, nuli.
----------------------------------------------------

Qod un extra norma somni-pikto fe pa habe, u-la nokti. Fe pa memo vide u magika vice-matri; qi pa kausa plu muta per un undu de fe baci. Cinerala pa vide fe-auto, habe epi fe plu maxi dekora vesti, ge-sed intra u grandi vagona du ki ad u grandi-kore. Fe klu pa pikto fe-auto kore ko plu kali andra. U somni-pikto pa sembla ta reali; fe pa memo: fe pa pote olface id. Intra fe somni-pikto, fe klu pa kredi: fe pa kore ko un An-prince!

Sed, to u-la punkta, fe hedo somni-pikto pa muta in u mali somni-pikto. Fe pa memo: fe pa akusti u kampana du sono; e fe pa ski: fe pa nece kursi. Holo-pe pa sembla casa fe; e un An-prince pa tanto kapti fe. Duranto u peti, kron fe pa salt-ana in u vagona, fe pa lose mo de fe pedi-ve. Id pa es u kali vitri pedi-ve; e intra fe somni-pikto, fe pa ski: fe pa debi ne lose id.
---------------------------------------------------

U seqe di, Cinerala pa sti vive tem meso-di. Plu hetero femina pa du somni, sed Cinerala pa tako aperi fe okula. Fe pa rekti sedi intra fe kli; e fe pa habe turba de u ge-lose pedi-ve ex fe somni-pikto.

Fe pa ski: fe ne pa ki ad u grandi-kore; e fe pa debi habe no turba de u no-reali pedi-ve. Sed, anti-co, ko u xeno este, fe pa fobo: u ge-lose pedi-ve sio kausa plu problema pro fe.

Kron, ultima, plu hetero persona de Cinerala domi pa leva-se, u cinera ge-tegu ju-fe pa akusti plu histori de u grandi-kore. Fe, natura, pa habe interese de u furura fe-regi de u landa; e pa habe plu qestio de An-prince Antoni ge-elekti gamo-fe.

Tem fe pa du akusti u histori de plu previo nokta eveni, Cinerala pa gene sko: plu ra ne pa acide akorda Frederiko skema. Un An-prince ne pra selekti u femina pro an gina; e, ma mali, nu u holo demo pa du cerka u juveni femina; qi pra kursi ex u grandi-kore. U holo regi-landa pa habe turba ka u kali misteri femina pra vaga in u grandi-kore, e pa kapti u kardia de un An-prince; pui, u xeno femina pa ki apo iso misteri de fe pra veni.

Duranto fe visita ad u grandi-kore, Antoni pra don a fe ma tem de ad u holo de plu ge-petitio femina. Seqe, posto fe pa tako ki ex u grandi-kore, An-prince Antoni pa habe u mali atitudi.

Cinerala ne vo akusti plu pluso nova de u grandi-kore. Id pa sti memo fe de uno-ra; e id pa sti turba fe. U ge-lose pedi-ve pa re-veni in fe menta.

Tem-co, in u holo regi-landa, il pa es mega dice de u-ci misteri femina. Pano-pe pa pote dice de no hetero ra. Pluso, il pa es u nova de un oficia-pe; kurso dia u regi-landa ko u femina pedi-ve. Anti-co, intra fe kucina, Cinerala pa aktivi fe-auto ko fe ergo. U-ci histori de u misteri femina pa sti ge-fobo u ju-fe; qi ne pa volu kogita de plu eveni de u previo nokta. Fe pa doxo: id sio es ma boni de no-memo u holo somni-pikto - klu plu hedo mero; supra-toto, plu hedo mero. Fe pa kredi ... pa ski ... ke fe ne pra akti id! Lento, mo lakrima pa forma intra fe okula, e pa komence volve kata fe buka. Pui, mo posto u hetero, plu lakrima pa kade. Plu guta pa disolve u cinera lo mu pa bate: mu pa makula fe vesti, e pa aqa u sola.

Seqe u-la di, po fe pa lave fe vesti, Cinerala pa este mega ma boni. Fe pa ergo fo forti, e pra tanto no-memo u kausa de fe tristi, tem fe pa akusti uno-pe du bate epi un ante tira. Cinerala pa rapidi lase-in un andra; qi pa fero u teka; e fe pa duce an a Fe Pompo. Klu ko fe rapidi ki ex u kamera, Cinerala pa pote akusti plura verba: "pedi", "cerka pro" e "holo plu domi intra u landa." Fe pa kredi: un andra pa habe no volu te vide fe. Ko-co, tem fe pa ki retro, fe pa moti ma rapidi de previo. Fe pa tosto sedi intra u gona de u kucina te puri u familia argenti. Po penta minuta de splendi argenti, fe pra kompleti no-memo u pedi-ve.

Sed no! Iso-tem Cinerala pa puri un argenti, fe fata pa atende fe to u posto tira.

Fe Magika pa gene u maxi hedo ex fe joko; e fe pa akti te sura id kompleti. Plu ra pra acide ma boni de fe maxi boni expekta: u holo regi-landa pa du stato epi id kapita; e un oficia-pe pa du kursi pan-lo ko u pedi-ve. Ex un info de fe espio, Hogo, Fe Magika pa korekti puta u seqe de plu acide. Fe pa ski: u Pompo domi sio tosto habe u visita ex u `pedi andra'; e fe pa gene la, toto ge-prepara, ko ta sati tem te gene Kali ge-prepara te enkontra un andra.

Te fini u joko, Fe Magika pa skema de vesti Cinerala in fe kore-vesti, e duce fe ad u `pedi andra' pre an ki ex u Pompo domi. So, u posto tira de u kucina pa explodi aperi; e Cinerala pa gene trauma ex vide u magika vice-matri ex fe somni-pikto. U ju-fe pa habe no volu pro plu pluso somni-pikto; e fe pa sono voka. Sed, anti fe plu voka, Fe Magika e Hogo pa vesti fe e pa don a fe u xeno ge-flavoro bibe. Klu anti fe plu lukta, mu pa trakto Cinerala ad u tira; qi duce ad un atria; e mu pa bali fe in un atria e pa klude u tira, posto fe.

Ko-co, Cinerala pa tanto bate kade un andra; qi pa habe u teka epi an braki. An pa imedia rekogni fe, e an pa demanda: fe loka u pedi-ve epi fe pedi. Previo, Fibi e Bibi, fe plu kako hemi-fe-sibi pra bi fali te loka ali mero de mu pedi intra u vitri pedi-ve; sed, anti-co, Kali pedi pa habe perfekto kongrue ko id.

U seqe eqa u norma histori. Cinerala pa game An-prince Antoni; e, seqe-tem, pa gene ge-nima Fe-regi Kali. Fe pa habe no mali este pro u Pompo familia; e klu pa auxi detekti plu andra pro fe bi fe-sibi - anti mu ne pa merita game. Fe pa es u maxi boni fe-regi: ke u regi-landa pra habe, ali-kron.

An-regi Antoni e Fe-regi Kali pa habe mega hedo e filo; e, amfi plu-ci ra, mu don a mu ge-regi-pe. Plu arti e sko pa flori duranto mu regi-tem.

So, la na habe u hedo fini ad u-ci histori. Sed, u maxi mira mero de u histori veni nu. Fe Magika pa gene tanto hedo ex fe akti iso u vice-matri ke fe pa doxo: fe sio debi dura u-ci ergo. Ex u-la tem, fe pa akti te korekti plu ero; fe pa detekti, intra u munda peri fe, te fero hedo a plu hetero-pe. E, fe pa komence u-ci ergo ko fe-auto, per game Hogo. Mu pa vita, e pa skema, fo hedo, tem poli seqe anua.

Main Menu ; Return to Stories index